Սեպտեմբերի 26-ին, ժամը 19:00-ին, Կոմիտասի անվան կամերային երաժշտության տանը կկայանա Վահագն Ստամբոլցյանի անվան երգեհոնային երաժշտության չորրորդ միջազգային փառատոնի հանդիսավոր բացման համերգը՝ նվիրված Կոմիտասին։ Համերգը նախատեսված է 6 տարեկանից բարձր հանդիսատեսի համար։

Բացման համերգը միավորում է հայտնի երգեհոնահարների, մենակատարների և «Գյուրջիև անսամբլի» ելույթները, ինչը ծրագիրը դարձնում է բազմազան և բովանդակային։ Երեկոյի ընթացքում կհնչեն Կոմիտասի, Մակար Եկմալյանի, Գրիգոր Նարեկացու, Էդուարդ Բաղդասարյանի, Միքայել Թարիվերդիևի, Գարի Քյոսայանի և այլ հեղինակների գործեր։

Ելույթ կունենան Հարություն Թագվորյանը, Թերեզա Ոսկանյանը, Լուսին Սառաջյանը, Կարինե Հովհաննիսյանը, Աննա Առուստամյանը, Դավիթ Հովհաննիսյանը, սոպրանո Իրինա Զաքյանը, սրնգահարուհի Հասմիկ Հարությունյանը և թավջութակահար Անդրանիկ Աղաջանյանը։ Ծրագրում ընդգրկված է նաև Էդուարդ Հայրապետյանի «Շարականներ» 3 կրկնագիր երգեհոնի համար ստեղծագործության առաջին կատարումը, իսկ «Գյուրջիև անսամբլը» հանդես կգա Լևոն Էսկենյանի ղեկավարությամբ։